फडणवीस आणि खडसे एकाच मंचावर, आणि गर्दीत खडसे पडले एकटे ....

यावेळी मंचावर खडसे काहीसे दूरच बसलेले दिसले. भाजपचे नेते या कार्यक्रमाला मोठ्या संख्येने उपस्थित आहेत.  गिरीश महाजन यांच्यासह अनेक भाजप नेते कार्यक्रमाला उपस्थित आहेत. गिरीश महाजन व देवेंद्र फडणवीस यांच्यात काही अंतर राखून खडसे बसलेले आहेत. त्यामुळे भाजप नेत्यांच्या गर्दीत खडसे एकाकी पडल्याचे पाहायला मिळाले. 

एकनाथ खडसे यांनी आपल्या भाषणातून राजकीय विधान करणे टाळले. आम्ही राजकीय विचारांच्या चपला बाहेर सोडून व्यासपीठावर आलो आहोत, असं म्हणत एकनाथ खडसे यांनी महानुभाव पंथाच्या विचारसरणीवर प्रकाश टाकला. त्यांनी आपल्या राजकीय कारकीर्दीची सुरुवात महानुभाव पंथापासून झाल्याचं सांगितलं.

“या राज्यात समृद्धी यावी. चक्रधर स्वामींनी दिलेल्या ज्ञानाप्रमाणे आपण सर्वांनी एकत्र राहावं. त्या स्वरुपाचं जीवन आपण एकमेकांनी जगावं. आपसातील मतभेद विसरावेत, धर्मांतील मतभेद विसरावेत” अशी अपेक्षा एकनाथ खडसे यांनी व्यक्त केली आहे. आपल्या भाषणानंतर एकनाथ खडसे यांनी आपले कट्टर विरोधक असणाऱ्या गिरीश महाजन आणि देवेंद्र फडणवीस यांची भेट घेतली. व्यासपीठावरच त्यांच्यात काही क्षण चर्चाही झाली.