सावत्र मुलाकडूनच बलात्कार! चार महिन्यांची गर्भवती झाल्यानंतर पीडित महिलेने गाठले पोलीस ठाणे

पीडित महिलेने दिलेल्या माहितीनुसार, २०२४ मध्ये तिची ओळख विकास श्रीवास्तव नावाच्या ५५ ​​वर्षीय व्यक्तीशी झाली. विकास हा एका खाजगी बँकेत व्यवस्थापक (मॅनेजर) म्हणून कार्यरत आहे. श्रीवास्तवने तिला नोकरी मिळवून देण्याचे आमिष दाखवून तिच्याशी जवळीक साधली, असा आरोप करण्यात आला आहे. त्यानंतर दोघांमध्ये प्रेमसंबंध निर्माण झाले आणि त्यांनी एका मंदिरात जाऊन विवाह केला. लग्नानंतर पीडित महिलेची ओळख अक्षतशी झाली. २१ वर्षीय अक्षत हा विकासच्या पहिल्या पत्नीचा मुलगा असून, तो सध्या एका नामांकित महाविद्यालयात दुसऱ्या वर्षाचा विद्यार्थी आहे.

तिने पुढे सांगितले की, मंदिरात लग्न झाल्यानंतर अवघ्या काही दिवसांतच पती-पत्नीमध्ये घरगुती वाद सुरू झाले होते. हे वाद इतके वाढले होते की त्यांची तक्रार पोलिसांकडेही करण्यात आली होती. यानंतर नोव्हेंबर २०२५ मध्ये आणि पुन्हा १० एप्रिल २०२६ रोजी, जेव्हा ती घरात एकटीच होती, तेव्हा तिचा सावत्र मुलगा अक्षत जबरदस्तीने तिच्या खोलीत शिरला आणि त्याने तिच्यावर बलात्कार केला.

पीडित महिलेच्या म्हणण्यानुसार, जेव्हा तिने आपल्या पतीकडे या भयानक अनुभवाबद्दल मन मोकळे केले, तेव्हा एक धक्कादायक बाब समोर आली. तिच्या पतीने तिला याबद्दल गप्प राहण्याचा सल्ला दिला. हे प्रकरण उघडकीस आल्यास कुटुंबाची बदनामी होईल आणि आपल्या मुलाचे भविष्य उद्ध्वस्त होईल, असा युक्तिवाद त्याने केला. पतीच्या या भूमिकेला कंटाळून आणि आपल्यावर झालेल्या अन्यायाविरुद्ध लढा देण्याचा निर्धार करून, तिने हिंमत एकवटली आणि मानकापूर पोलीस ठाणे गाठले. तिच्या तक्रारीवरून पोलिसांनी सावत्र मुलावर बलात्काराशी संबंधित कलमांखाली गुन्हा दाखल केला असून, त्याला अटक करण्यासाठी शोधमोहीम सुरू केली आहे.