दोन कोटी मतदार कायमचे बाद झाले असं समजू नका, मुख्य निवडणूक अधिकाऱ्यांचं वक्तव्य

७६.८० लाख मतदार कायमस्वरूपी स्थलांतरित झालेले आहे.

२.०७ कोटी मतदारांची विभागणी:

अनुपस्थित/सापडले नाहीत: ७५.५२ लाख

कायमस्वरूपी स्थलांतरित: ७६.८० लाख

मृत: ३४.८१ लाख

दुबार/इतरत्र नोंदणी: १७.६३ लाख

इतर: २.२३ लाख

मुख्य निवडणूक अधिकारी काय म्हणाले?

सर्वात मोठी गैरसमजूत म्हणजे या २.०७ कोटींना कायमचे हटवले गेले असे समजणे. सुमारे १७ लाख मतदारांची नावे दोन ठिकाणी होती, त्यामुळे एका ठिकाणची नोंद काढली तरी दुसरीकडे नाव राहू शकते. मृत मतदारांची नावे काढणे म्हणजे यादी शुद्ध करणे आहे.

ही प्रारूप यादी आहे, अंतिम नाही. दावे व आक्षेप प्रक्रिया सुरू राहील. प्रत्येक मतदाराने स्वतःची नाव तपासावी. नाव नसल्यास फॉर्म ६ भरून समावेशासाठी अर्ज करावा. दुरुस्तीसाठी फॉर्म ८, तर आक्षेपासाठी फॉर्म ७.

बीएलओंनी किमान एकदा (आणि न सापडल्यास तीनदा) भेट दिली होती. शहरी भागात काही व्यावहारिक अडचणी असू शकतात (उदा. लोक उशिरा घरी येणे).

मतदारांनी काय करावे?

नाव ऑनलाइन तपासा: स्थानिक जिल्हाधिकारी कार्यालयाच्या संकेतस्थळावर जाऊन मसुदा यादीत तुमचे नाव तपासा. तुमचे नाव गहाळ असल्यास किंवा दुरुस्ती करायची असल्यास ३१ ऑगस्ट ते ३० सप्टेंबर २०२६ या कालावधीत अर्ज सादर करा. यादीतून नाव वगळले गेले असल्यास फॉर्म ६ (Form 6) भरून पुन्हा नावाचा समावेश करण्यासाठी अर्ज करा. नावाचे स्पेलिंग, पत्ता किंवा इतर दुरुस्त्यांसाठी फॉर्म ८ (Form 8) ऑनलाइन किंवा स्थानिक बीएलओ (BLO) कडे जमा करा

अंतिम मतदार यादी: आलेल्या सर्व अर्जांची छाननी करून ४ नोव्हेंबर २०२६ रोजी राज्याची अंतिम आणि अचूक मतदार यादी प्रसिद्ध केली जाईल. तसेच शहरी भागातील नोकरदार किंवा इतर कारणांमुळे तात्पुरते बाहेर असणाऱ्या नागरिकांनी या मसुदा यादीत आपले नाव काळजीपूर्वक तपासून घेण्याचे आवाहन निवडणूक आयोगाने केले आहे.  

Edited By- Dhanashri Naik