मुंबईतील रहिवासी इमारतीला भीषण आग, किमान 50 जणांना बाहेर काढले, कोणतीही जीवितहानी नाही

मुंबई- दक्षिण मुंबईतील काळबादेवी परिसरातील एका सात मजली निवासी इमारतीला गुरुवारी रात्री उशिरा भीषण आग लागली. मात्र या घटनेत कोणतीही जीवितहानी झाल्याची माहिती नाही. अधिकाऱ्यांनी ही माहिती दिली.

धनजी रस्त्यावरील प्रसिद्ध मुंबादेवी मंदिराजवळ असलेल्या इमारतीत सकाळी 1.30 च्या सुमारास आग लागली आणि इमारतीमध्ये अडकलेल्या अनेकांना बाहेर काढण्यात आले, असे त्यांनी सांगितले.

"घटनेच्या वेळी आवारात 50 ते 60 लोक अडकले होते पण त्यांना अग्निशमन दलाच्या जवानांनी जवळच्या इमारतीच्या पायऱ्यांचा वापर करून सुखरूप बाहेर काढले," असे महापालिकेच्या अधिकाऱ्याने सांगितले.

अग्निशमन दलाच्या 12 गाड्या सध्या घटनास्थळी हजर असून आग विझवण्याचे काम सुरू असल्याचे त्यांनी सांगितले.

सर्व बाजूंनी आग विझवण्याचे काम सुरू आहे, असे ते म्हणाले. या घटनेत अद्याप कोणतीही जीवितहानी झाल्याचे वृत्त नाही.

पहिल्या आणि दुसर्‍या मजल्यावरील छताचा काही भाग आणि जिन्यांचा काही भाग कोसळला असल्याने सावधगिरी म्हणून इमारतीच्या बाहेरून अग्निशमन ऑपरेशन केले जात आहे, असे अधिकाऱ्याने सांगितले.

आग तळमजल्यावरून सुरू होऊन पाचव्या मजल्यापर्यंत पसरल्याचे त्यांनी सांगितले. आगीचे कारण अद्याप समजू शकलेले नाही.