१,००० हून अधिक बॉम्बचे बनावट संदेश पाठवणाऱ्या व्यक्तीला अटक; दिल्ली पोलिसांची मोठी कारवाई

दिल्ली पोलिसांनी कर्नाटकातील म्हैसूर येथील भाड्याच्या घरातून ४७ वर्षीय श्रीनिवास लुईसला अटक केली आहे. त्याच्यावर देशभरातील विविध संस्था, उच्च न्यायालये आणि सरकारी कार्यालयांना लक्ष्य करून १,००० हून अधिक खोटे धमकीचे संदेश पाठवल्याचा आरोप आहे. त्याच्यावर अनेक राज्यांमध्ये गुन्हे दाखल आहे.

दिल्ली पोलिसांच्या म्हणण्यानुसार, श्रीनिवासवर शाळा आणि न्यायालयांसह अनेक महत्त्वाच्या संस्थांना ईमेलद्वारे धमक्या पाठवल्याचा आरोप आहे. या संदेशांमध्ये बॉम्ब हल्ल्याच्या धमक्यांचा इशारा होता, ज्यामुळे अनेक शहरांमध्ये भीती आणि घबराटीचे वातावरण निर्माण झाले.

तपासात असे उघड झाले आहे की, आरोपीने धमकीचे संदेश पाठवण्यासाठी वेगवेगळे ईमेल आयडी आणि डिजिटल माध्यमांचा वापर केला. प्रत्येक वेळी नवीन आयडी तयार करून त्याने पोलिसांची दिशाभूल करण्याचा प्रयत्न केला.

प्राथमिक तपासात असे दिसून आले आहे की, ही व्यक्ती मानसिकदृष्ट्या अस्थिर आहे. त्याला आज दिल्लीत आणले जाईल आणि त्याची सखोल चौकशी केली जाईल.

Edited By- Dhanashri Naik