रेल्वे स्थानकांनावरील पिण्याच्या पाण्यात 'ई-कोलाय'; आता प्रशासनाकडून कडक पावले!
कॅगच्या तपासणीत ४९ पैकी आठ स्थानकांवरील पाण्याच्या नमुन्यांमध्ये ई. कोलाय जिवाणू आढळले. या अहवालात नियमित पाणी तपासणी आणि क्लोरीन देखरेखीच्या अभावावर प्रश्नचिन्ह उपस्थित करण्यात आले आहे.
प्रवाशांना सुरक्षित पिण्याचे पाणी पुरवण्यासाठी, रेल्वेने संपूर्ण रेल्वे नेटवर्कवर एक विशेष स्वच्छता मोहीम सुरू केली आहे. स्थानकांवरील पाण्याच्या टाक्या, गाळण यंत्रणा (फिल्ट्रेशन सिस्टीम) आणि पिण्याच्या पाण्याची पायाभूत सुविधा स्वच्छ व निर्जंतुक केली जाईल. पाण्याच्या स्रोतापासून ते प्रवाशांसाठी पिण्याच्या ठिकाणापर्यंत पाण्याच्या गुणवत्तेवर देखरेख ठेवली जाईल.
अलीकडील कॅगच्या अहवालानंतर रेल्वेचा हा उपक्रम महत्त्वपूर्ण आहे. कॅगच्या तपासणीत ४९ पैकी आठ स्थानकांवरील पाण्याच्या नमुन्यांमध्ये ई. कोलाय जिवाणू आढळले. या अहवालात नियमित पाणी तपासणी आणि क्लोरीन देखरेखीच्या अभावावर प्रश्नचिन्ह उपस्थित करण्यात आले आहे.
रेल्वेतर्फे खालील उपाययोजना केल्या जातील
पाण्याचे स्रोत, प्रक्रिया-गाळण प्रकल्प, भूमिगत आणि जमिनीवरील टाक्या, पीव्हीसी टाक्या, वॉटर बूथ, नळ आणि वितरण केंद्रांची तपासणी केली जाईल.
टाक्या रिकाम्या करून त्यातील गाळ काढला जाईल. स्वच्छता आणि निर्जंतुकीकरणानंतर, झाकणे, व्हेंट्स आणि ओव्हरफ्लो पॉइंट्सची देखील तपासणी केली जाईल.
दोषपूर्ण टाक्या, पाईपलाईन आणि फिल्टर्स दुरुस्त केले जातील किंवा बदलले जातील. पिण्याच्या पाण्याच्या आणि इतर पाण्याच्या लाईन्समधील क्रॉस-कनेक्शन्सची तपासणी केली जाईल.
पाईपलाईन्समधील गळती दूर करून पाण्याची नासाडी टाळली जाईल. हातपंप आणि बोअरवेलमधील पाणी प्रदूषणमुक्त आणि पिण्यायोग्य आहे याची खात्री करण्यासाठी त्याचीही तपासणी केली जाईल.
वॉटर कूलर्स आणि आरओ-यूव्ही सिस्टीम्सची तपासणी
वॉटर कूलरच्या टाक्या स्वच्छ केल्या जातील. कूलर्स, पाईप्स आणि नळांमधील गळती तात्काळ दुरुस्त केली जाईल.
आरओ-यूव्ही सिस्टीम्सची तपासणी केली जाईल. आवश्यकतेनुसार नवीन सिस्टीम्स बसवल्या जातील आणि दोषपूर्ण फिल्टर्स व इतर भाग बदलले जातील.
स्वच्छता आणि गुणवत्तेचे हेच निकष वॉटर वेंडिंग मशीन्सनाही लागू होतील.
पाण्याच्या स्रोतामधून, टाकीमधून, कुलरमधून, व्हेंडिंग मशीनमधून आणि नळांमधून पाण्याचे नमुने घेतले जातील आणि त्यांची भौतिक, रासायनिक आणि जिवाणूशास्त्रीय चाचणी केली जाईल.
पाण्यातील अवशिष्ट क्लोरीनवर दररोज लक्ष ठेवले जाईल. आवश्यक असल्यास पुनर्-क्लोरीनीकरण केले जाईल.
रेल्वे बोर्डाने मंजूर केलेल्या ओव्हरहेड आणि भूमिगत टाक्यांचे बांधकाम आणि सुधारणा जलदगतीने करण्याचे निर्देश दिले आहे. आवश्यकतेनुसार नवीन कामांना मंजुरी दिली जाईल. मोहिमेदरम्यान आढळलेल्या त्रुटींचा स्थानकनिहाय अहवाल तयार केला जाईल आणि त्यांच्या सुधारणेवर देखरेख ठेवली जाईल. रेल्वे वसाहती आणि कामाच्या ठिकाणांचाही पिण्याच्या पाण्याच्या प्रणालीमध्ये समावेश करण्यात आला आहे.
Edited By- Dhanashri Naik
