पुणे जिल्ह्यातील ज्येष्ठ रिक्षा-टॅक्सी चालकांना मिळणार १०,०००
पुणे जिल्ह्यातील ज्येष्ठ रिक्षा आणि मीटर टॅक्सी चालकांसाठी ही अत्यंत महत्त्वाची आणि आनंदाची बातमी आहे. राज्य सरकारच्या 'धर्मवीर आनंद दिघे महाराष्ट्र ऑटोरिक्षा आणि मिटर टॅक्सीचालक-मालक कल्याणकारी मंडळा' अंतर्गत पात्र ज्येष्ठ चालकांना १०,००० रुपये सन्मान निधी (निवृत्ती मानधन) दिला जात आहे.
पुणे प्रादेशिक परिवहन कार्यालयाने (RTO) जिल्ह्यातील सर्व पात्र चालकांना या योजनेचा लाभ घेण्यासाठी तातडीने ऑनलाईन नोंदणी करण्याचे आवाहन केले आहे. या योजनेचे नियम, पात्रता आणि नोंदणीची सविस्तर माहिती खालीलप्रमाणे आहे.
मुख्य पात्रता निकष
वयोमर्यादा: अर्जदार रिक्षा किंवा टॅक्सीचालक-मालक सभासदाने १ जानेवारी २०२६ रोजी वयाची ६५ वर्षे पूर्ण केलेली असावीत. ज्या चालकांनी १ मे २०२६ पर्यंत या कल्याणकारी मंडळाकडे आपली अधिकृत सभासद नोंदणी पूर्ण केली आहे, तेच या १०,००० रुपयांच्या लाभासाठी पात्र असतील.
आवश्यक कागदपत्रे
ऑनलाईन अर्ज करताना चालकांकडे खालील कागदपत्रे असणे आवश्यक आहे:
१. ड्रायव्हिंग लायसन्स (चालन अनुज्ञप्ती)
२. आरटीओ बॅज (RTO Badge) आणि परवाना (Permit)
३. आधार कार्ड
४. पॅन कार्ड
५. रेशन कार्ड
६. बँक खाते तपशील (बँक पासबुक किंवा कॅन्सल चेक) – कारण हा लाभ थेट बँक खात्यात (DBT द्वारे) जमा केला जाईल.
ऑनलाईन नोंदणी कुठे आणि कशी करावी?
पात्र धारकांनी मंडळाच्या अधिकृत संकेतस्थळावर म्हणजेच ananddighekalyankarimandal.org वर जाऊन आपली ऑनलाईन नोंदणी करणे बंधनकारक आहे.
जर तुम्ही आधीच नोंदणी केली असेल, तर याच वेबसाईटवर जाऊन तुमचा बँक खाते तपशील अपडेट (अद्ययावत) करणे गरजेचे आहे, जेणेकरून पैसे थेट तुमच्या खात्यात जमा होतील.
पुणे जिल्ह्यातील जास्तीत जास्त रिक्षा आणि टॅक्सी जेष्ठ चालकांनी वेळेत नोंदणी करून या योजनेचा लाभ घ्यावा, असे आवाहन पुणे आरटीओ प्रशासनाने केले आहे.
Edited By- Dhanashri Naik
