'सीरम इन्स्टिट्यूट'कडून प्रत्येकी २५ लाखांची मदत जाहीर
पुण्याच्या सीरम इन्स्टिट्यूटच्या इमारतीला लागलेल्या आगीत मृत्यूमुखी पडलेल्यांच्या नातेवाईकांना प्रत्येकी २५ लाखांची मदत 'सीरम इन्स्टिट्यूट'कडून जाहीर करण्यात आली आहे. आगीत सीरमच्या पाच कर्मचाऱ्यांचा मृत्यू झाला आहे.
"सीरम इन्स्टिट्यूटसाठी आजचा दिवस अतिशय दु:खद आहे. दुर्घटनेत मृत्यूमुखी पडलेल्यांच्या कुटुंबियांच्या दु:खात आम्ही सहभागी आहोत. कंपनीच्या निर्धारित नियमांच्या पलिकडे जाऊन दुर्घटनेतील मृत्यूमुखींच्या कुटुंबियांना प्रत्येकी २५ लाखांची मदत जाहीर करत आहोत", असं सीरमचे अध्यक्ष आणि व्यवस्थापकीय संचालक सायरस पुनावला यांनी म्हटलं आहे.
सीरमच्या आगीत पाच जणांचा मृत्यू झाल्याची माहिती समोर आल्यानंतर कंपनीचे सीईओ अदर पुनावाला यांनी दु:ख व्यक्त केलं. "दुर्घटनेत काहींना आपला जीव गमवावा लागल्याची माहिती मिळाली. ऐकून अतिशय दु:ख झालं. मृत्यूमुखींच्या कुटुंबियांच्या दु:खात आम्ही सहभागी आहोत", असं ट्विट अदर पुनावाला यांनी केलं आहे.
