भोसरीमध्ये भीषण अपघात! मोकळ्या मैदानात उभ्या असलेल्या तीन ट्रॅव्हल बसेस जळून खाक झाल्या
भोसरीतील रोशल गार्डनजवळ मोकळ्या मैदानात उभ्या असलेल्या चिंतामणी आणि पारसमणीच्या तीन खासगी ट्रॅव्हल बसेसना अचानक आग लागली. अग्निशमन दलाच्या पाच गाड्यांनी एका तासात आगीवर नियंत्रण मिळवले.
मिळालेल्या माहितीनुसार भोसरीतील रोशल गार्डनसमोरील मोकळ्या मैदानात उभ्या असलेल्या तीन खासगी ट्रॅव्हल बसेसना बुधवारी सायंकाळी ७ वाजता अचानक आग लागली. आगीने जवळच उभ्या असलेल्या इतर दोन बसेसनाही वेगाने आपल्या भक्ष्यस्थानी पाडले. या घटनेत तिन्ही बसेस पूर्णपणे जळून खाक झाल्या. दिलासादायक बाब म्हणजे या अपघातात कोणतीही जीवितहानी झाली नाही.
भोसरीतील अंकुशराव लांडगे थिएटरसमोरील आणि रोशल गार्डनजवळील मैदानात मोठ्या संख्येने खासगी ट्रॅव्हल बसेस उभ्या असतात. बुधवारी सायंकाळी ७ वाजण्याच्या सुमारास, रोशल गार्डनजवळ उभ्या असलेल्या चिंतामणी ट्रॅव्हल्सच्या एका बसला अचानक आग लागली. आगीने लवकरच जवळच पार्क केलेल्या चिंतामणी ट्रॅव्हल्सच्या दुसऱ्या बसला आणि पारसमणी ट्रॅव्हल्सच्या आणखी एका बसला आपल्या भक्ष्यस्थानी पाडले. आगीची माहिती मिळताच महानगरपालिकेच्या अग्निशमन दलाच्या पाच गाड्या घटनास्थळी दाखल झाल्या. सुमारे एका तासाच्या प्रयत्नांनंतर अग्निशमन दलाच्या जवानांनी आगीवर नियंत्रण मिळवले. मात्र, तोपर्यंत तिन्ही बसेस मोठ्या प्रमाणात जळून खाक झाल्या होत्या. आगीचे नेमके कारण अद्याप अस्पष्ट आहे. अग्निशमन दल आणि संबंधित विभाग माहिती गोळा करत आहे.
