पिंपळगाव बसवंतचे हेरिटेज ट्री ‘गुगल मॅप’वर; पुरातन वृक्षांची डिजिटल नोंद घेणारी राज्यातली पहिली ग्रामपंचायत

नाशिकच्या निफाड तालुक्यातील असलेली पिंपळगाव बसवंत ही ग्रामपंचायत असून त्यांनी “हेरीटेज ट्री” (पुरातन वृक्ष) गणना पूर्ण केली आहे. गावाच्या एकुण क्षेत्रफळात 16,500 वृक्षांचा समावेश असून त्यापैकी 480 वृक्ष हे पुरातन “हेरीटेज ट्री” (पुरातन वृक्ष) आढळून आले आहेत. यात सगळ्यात जुने 220 वर्षांपूर्वीचे एक वडाचे झाड आढळले असून बाकी वृक्षांचे आयुर्मान देखील 100 ते 150 वर्ष इतके आहे. तसेच ही वृक्ष गणना पूर्ण करून गुगल मॅप्स वर प्रकाशित करण्यात आली आहे. डिजिटल पद्धतीने वृक्षांचे छायाचित्रासह नाव आणि माहिती गुगल मॅप्स वर प्रकाशित करणारी पिंपळगाव बसवंत ही राज्यातील पहिली ग्रामपंचायत ठरली आहे. शासनाच्या माझी वसुंधरा अभियानाच्या फेसबुक पेजवर हेरिटेज वृक्षांच्या नोंदीची दखल घेण्यात आली असून पर्यावरण विभागाच्या सचिव डॉ. मनीषा म्हैसेकर यांनी याबद्दल फेसबुकवर कौतुक केले आहे. या ग्रामपंचायतीचे सरपंच श्रीमती अलका (आक्का) अशोकराव बनकर, ग्रामसेवक लिंगराज जंगम यांनी यासाठी प्रयत्न केले.