Yuvraj Singh:युवराज सिंगची कामगिरी,सहा चेंडूत सहा षटकार ठोकले, इतिहास रचला
19 सप्टेंबर आणि वर्ष 2007 रोजी डर्बनचे किंग्समीड मैदान आणि T20 विश्वचषक स्पर्धा . बरोबर 16 वर्षांपूर्वी युवराज सिंगने एक अशी कामगिरी केली होती जी जागतिक क्रिकेटमध्ये फार कमी फलंदाजांना करता आली आहे. युवीने डरबनमध्ये बॅटने असा कहर केला होता. युवराजच्या कारकिर्दीतील तो सर्वात संस्मरणीय दिवस होता आणि स्टुअर्ट ब्रॉडसाठी अविस्मरणीय सामना होता. डाव्या हाताच्या फलंदाजाने ब्रॉडविरुद्ध सहा चेंडूंत सहा षटकार ठोकले होते आणि अवघ्या 12 चेंडूत अर्धशतक ठोकले होते, जो आजही एक विश्वविक्रम आहे.
युवीक्रीझवर आले तेव्हा फक्त 3.5 षटकांचा खेळ शिल्लक होता. पहिल्यांदा टीम इंडियाचे कर्णधार असलेला एमएस धोनी त्याला साथ देण्यासाठी क्रीजवर उपस्थित होता. मात्र, युवीच्या डावाच्या सुरुवातीलाच त्याच्यात आणि अँड्र्यू फ्लिंटॉफमध्ये जोरदार वाद झाला. फ्लिंटॉफ युवराजला काहीतरी बोलताना दिसला, त्यानंतर युवी बॅट घेऊन त्याच्याकडे गेला.
फ्लिंटॉपसोबत झालेल्या वादानंतर युवराज सिंग पुढच्याच षटकात स्ट्राइकवर होता. युवीसमोर गोलंदाज स्टुअर्ट ब्रॉड होता . त्या दिवशी कदाचित ब्रॉडला देखील कल्पना नव्हती की हा त्याच्या कारकिर्दीतील सर्वात काळा दिवस असणार आहे. युवराजने तुफानी शैलीत फलंदाजी करत ब्रॉडच्या षटकातील प्रत्येक चेंडू सीमारेषेच्या पलीकडे नेला. म्हणजे युवीच्या बॅटमधून सहा चेंडूत सहा षटकार निघाले. त्या दिवशी ब्रॉडची प्रत्येक चाल युवराजसमोर अपयशी ठरली आणि इंग्लिश कर्णधारही प्रयत्न करूनही युवीचे वादळ रोखू शकला नाही.
सहा चेंडूत सहा षटकार मारण्यासोबतच युवराज सिंगने अवघ्या 12 चेंडूत अर्धशतक झळकावत नवा इतिहासही रचला. भारताच्या स्टार फलंदाजाने पहिल्या सहा चेंडूंवर केवळ 14 धावा केल्या होत्या. मात्र, पुढच्या सहा चेंडूंवर युवराजची धावसंख्या पन्नाशीच्या पुढे गेली होती. आजही टी-20 आंतरराष्ट्रीय क्रिकेटमध्ये युवराजचा हा ऐतिहासिक विक्रम कोणत्याही फलंदाजाला मोडता आलेला नाही.
Edited by - Priya Dixit
