खंडणीप्रकरणात दाऊदचा भाऊ इकबाल कासकरला अटक

हत्या आणि सारा सहारा प्रकरणातील आरोपी

इक्‍बाल कासकर याला 2003 साली संयुक्‍त अरब अमिरातीमधून भारतात आणण्यात आले आहे. एका हत्येच्या प्रकरणामध्ये आणि सारा सहारा प्रकरणामध्येही तो पोलिसांना हवा होता. सारा सहारा ही इमारत सरकारी जमिनीवर बेकायदेशीरपणे उभारण्यात आली होती. चार वर्षांनंतर कोर्टाने इक्‍बाल कासकरला या दोन्ही प्रकरणांमधून निर्दोष मुक्‍त केले होते. खंडणी प्रकरणी इक्‍बाल कासकरबरोबर अन्य दोघांचीही नावे आहेत. इक्‍बाल हा मुंबई, ठाणे, उल्हासनगर, डोंबवली आदी भागांमधील बिल्डरांकडून मोठ्या प्रमाणात खंडणी उकळण्यासाठी धमक्‍या देत असे. या खंडणीमध्ये तो भाऊ दाऊदच्या वाट्याचीही खंडणी मागत असे. मात्र नोटबंदी आणि रेरा कायद्यामुळे अडचणीत असलेल्या बिल्डरांना या मोठ्या रकमेच्या खंडण्या देणे अवघड होऊ लागले होते. त्यामुळे त्याच्याविरोधात पोलिसांकडे तक्रार करण्यात आली. तक्रारदार बिल्डरने ठाण्याचे पोलिस आयुक्‍त परमबीर सिग यांच्याकडे याबाबतची तक्रार नोंदवली होती. इक्‍बाल कासकरवर खंडणीव्यतिरिक्‍त “मोक्का’ अंतर्गत गुन्हा दाखल केला जाण्याची शक्‍यता आहे. त्याला यापूर्वी 2015 मध्येही खंडणीप्रकरणी अटक करण्यात आली होती. तेंव्हा तो जामिनावर सुटला होता.