MPSC paper leak case महाराष्ट्र काँग्रेसचे प्रदेशाध्यक्ष हर्षवर्धन सपकाळ यांच्याविरोधात गुन्हा दाखल

आता अभिमन्यू पवार यांनी हे आरोप “निराधार, हास्यास्पद आणि राजकीय हेतूने प्रेरित” असल्याचे सांगत तक्रार दाखल केली.

मिळालेल्या माहितीनुसार MPSC कथित पेपरफुटी प्रकरणात सोशल मीडियावर खोटी आणि बदनामीकारक माहिती प्रसारित केल्याप्रकरणी महाराष्ट्र काँग्रेसचे प्रदेशाध्यक्ष हर्षवर्धन सपकाळ यांच्याविरोधात लातूर जिल्ह्यातील औसा पोलीस ठाण्यात गुन्हा दाखल करण्यात आला आहे. औसा मतदारसंघाचे भाजप आमदार अभिमन्यू पवार यांनी ही तक्रार दाखल केली आहे. 

माहितीनुसार सपकाळ यांनी याआधी असे म्हटले होते की, MPSC ड्रग इन्स्पेक्टर परीक्षेचा पेपर परीक्षा होण्यापूर्वीच WhatsApp वर फिरत होता आणि मूल्यांकन प्रक्रियेतही अनियमितता आहे. त्यांनी सरकार आणि यंत्रणांवर मौन बाळगल्याचा आरोप केला होता. तसेच या प्रकरणामुळे राजकीय वाद अधिक तीव्र झाला आहे. सपकाळ यांनी यापूर्वीही NEET, TET आणि आता MPSC पेपरफुटीबाबत सरकारवर टीका केली होती. तसेच हर्षवर्धन सपकाळ यांनी सोशल मीडिया प्लॅटफॉर्म 'X' वर एक पोस्ट केली होती. त्यामध्ये त्यांनी विचारले होते, "MPSC पेपरफुटीचे मास्टरमाइंड देवेंद्र फडणवीस आहेत का?" तसेच, या प्रकरणाचे धागेदोरे भाजप आमदार अभिमन्यू पवार यांच्यापर्यंत पोहोचत असल्याचा संशय व्यक्त केला होता. 

आता आमदार अभिमन्यू पवार यांनी हे आरोप पूर्णपणे हास्यास्पद, निराधार आणि राजकीय हेतूने प्रेरित असल्याचे म्हटले आहे. या प्रकरणाशी कोणताही संबंध नसताना आपली जाहीर बदनामी केल्याचा आक्षेप घेत त्यांनी पोलिसांत धाव घेतली. अशी माहिती समोर आली आहे. 

Edited By- Dhanashri Naik