सौभाग्य आणि आस्वाद: वटपौर्णिमेच्या उपवासासाठी शरीराला ऊर्जा देणारा पारंपारिक पदार्थ
वटपौर्णिमेच्या उपवासासाठी किंवा कोणत्याही सणावाराला झटपट बनणारी ही एक 'शाही' स्वीट डिश आहे. मखाणा आणि ड्रायफ्रूट्स खीर हा केवळ चवीलाच अप्रतिम नाही, तर आरोग्यासाठी अत्यंत फायदेशीर आणि पौष्टिक पदार्थ आहे. मखाण्यामध्ये भरपूर प्रमाणात कॅल्शियम, प्रोटीन आणि अँटी-ऑक्सिडंट्स असतात. ही मऊ आणि क्रीमी खीर कशी बनवायची, याची सोपी रेसिपी जाणून घ्या...
साहित्य-
मखाणे: २ कप
दूध (फुल फॅट): १ लिटर
साखर किंवा गूळ पावडर: ४ ते ५ मोठे चमचे (किंवा आवडीनुसार)
मिश्र ड्रायफ्रूट्स: पाव कप (काजू, बदाम, पिस्ताचे काप)
चारोळी आणि मनुके: १ मोठा चमचा
साजूक तूप: २ मोठे चमचे
वेलची पूड: १ छोटा चमचा
केशर: ७ ते ८ काड्या (२ चमचे कोमट दुधात भिजवलेल्या)
कृती-
१. मखाणे आणि ड्रायफ्रूट्स भाजणे: एका कढईत १ चमचा तूप गरम करा. त्यात काजू, बदाम आणि पिस्त्याचे काप हलके सोनेरी होईपर्यंत भाजून घ्या आणि एका वाटीत काढून ठेवा. त्याच कढईत उरलेले १ ते २ चमचे तूप घाला आणि मखाणे मंद आचेवर ४-५ मिनिटे छान कुरकुरीत (Crispy) होईपर्यंत भाजून घ्या. (मखाणा हातात घेऊन दाबल्यावर त्याचा सहज चुरा झाला पाहिजे).
२. मखाणे वाटणे: भाजलेले मखाणे थोडे थंड होऊ द्या. त्यातील पाऊण भाग (३/४ भाग) मिक्सरमध्ये जाडसर (भरड) वाटून घ्या. उरलेले थोडे मखाणे अख्खेच बाजूला ठेवा, जे खिरीमध्ये छान दिसतात आणि खाताना क्रंची लागतात.
३. दूध आटवणे: एका जाड बुडाच्या पातेल्यात १ लिटर दूध गरम करायला ठेवा. दुधाला चांगली उकळी आल्यावर गॅस मध्यम करा आणि दूध थोडे आ आटेपर्यंत (साधारण १०-१५ मिनिटे) शिजवून घ्या.
४. खीर तयार करणे: आटलेल्या दुधात मिक्सरवर वाटलेली मखाण्याची भरड, अख्खे मखाणे आणि भिजवलेले केशरचे दूध घाला. सर्व मिश्रण व्यवस्थित हलवून घ्या. मखाणे दुधात छान मऊ होईपर्यंत मंद आचेवर ५ ते ७ मिनिटे शिजू द्या. मिश्रण हळूहळू घट्ट होऊ लागेल. आता यात साखर, वेलची पूड आणि आधी तूपामध्ये भाजलेले ड्रायफ्रूट्स, चारोळी आणि मनुके घाला. साखर पूर्ण विरघळल्यावर आणखी २ मिनिटे खीर उकळू द्या आणि मग गॅस बंद करा. पौष्टिक मखाणा ड्रायफ्रूट्स खीर तयार आहे! ही खीर तुम्ही गरमागरम सर्व्ह करू शकता किंवा फ्रिजमध्ये ठेवून थंडगार खाऊ शकता. थंड झाल्यावर ही खीर आणखी जास्त क्रीमी आणि दाटसर लागते.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
Edited By- Dhanashri Naik
