घरी हॉटेलसारखा चमचमीत काश्मिरी दम आलू कसा बनवायचा, याची सोपी रेसिपी

साहित्य-
छोटे बटाटे - १० ते १२
दही - १ कप (चांगले फेटून घेतलेले)
मोहरीचे तेल - तळण्यासाठी आणि ग्रेव्हीसाठी (मोहरीच्या तेलामुळे अस्सल चव येते)

मसाले आणि पावडर:
काश्मिरी लाल तिखट - २ मोठे चमचे (यामुळे छान लाल रंग येतो, तिखटपणा कमी असतो)
बडीशेप पावडर - १ मोठा चमचा
सुंठ पावडर - १ छोटा चमचा
जिरे पावडर - १ छोटा चमचा
गरम मसाला - १/२ छोटा चमचा
हळद - १/२ छोटा चमचा
हिंग - १/४ छोटा चमचा
मीठ - चवीनुसार

अख्खे मसाले (फोडणीसाठी):
जिरे - १ छोटा चमचा
दालचिनी - १ लहान तुकडा
लवंग - २ ते ३
मोठी विलायची (काळी विलायची) - १
तमालपत्र - १

कृती-
१. बटाटे तयार करणे:
सर्वप्रथम छोटे बटाटे उकडवून घ्या (लक्षात ठेवा, बटाटे जास्त उकडू नका, फक्त ८०% शिजवून घ्या).
बटाट्याची साले काढून घ्या आणि एका सुईने किंवा चमच्याने (Fork) बटाट्यांना सगळीकडून छोटी-छोटी छिद्रे पाडा (जेणेकरून मसाला आतपर्यंत जाईल). कढईत मोहरीचे तेल कडकडीत गरम करा आणि हे बटाटे मंद आचेवर सोनेरी आणि कुरकुरीत होईपर्यंत तळून घ्या. तलेले बटाटे बाजूला ठेवा.

२. मसाल्याचे मिश्रण तयार करणे:
एका वाटीत फेटलेले दही घ्या. त्यात काश्मिरी लाल तिखट, बडीशेप पावडर, सुंठ पावडर, जिरे पावडर आणि हळद घालून सर्व मसाले दह्यामध्ये व्यवस्थित मिक्स करून घ्या. (दह्यात मसाले मिक्स केल्यामुळे दही तेलात टाकल्यावर फाटत नाही).

३. ग्रेव्ही बनवणे:
कढईत २ मोठे चमचे मोहरीचे तेल गरम करा (तळलेले तेल वापरू शकता). तेल गरम झाल्यावर गॅस मंद करा. त्यात जिरे, तमालपत्र, लवंग, दालचिनी, मोठी विलायची आणि हिंग टाका. आता गॅस अगदी बारीक करा किंवा बंद करा आणि तयार केलेले दह्याचे मिश्रण कढईत ओता. मिश्रण ओतल्याबरोबर चमच्याने ते सतत हलवत राहा, जेणेकरून दही फाटणार नाही. गॅस चालू करून मध्यम आचेवर या मसाल्याला तेल सुटेपर्यंत (३-४ मिनिटे) चांगले परतून घ्या.

४. शिजवणे:
मसाल्याला तेल सुटल्यावर त्यात तळलेले बटाटे आणि चवीनुसार मीठ घाला. सर्व मिश्रण एकत्र करा.त्यात गरजेनुसार पाऊण ते एक कप कोमट पाणी घाला.आता कढईवर घट्ट झाकण ठेवा. (हवे असल्यास झाकणाच्या कडेला गव्हाचे पीठ लावून वाफ बंद करू शकता).मंद आचेवर बटाट्यांना ८ ते १० मिनिटे चांगला 'दम' द्या, जेणेकरून सगळी ग्रेव्ही बटाट्यांच्या आत मुरेल. शेवटी वरून गरम मसाला घाला आणि गॅस बंद करा. तुमचा गरमागरम, चमचमीत आणि सुवासिक काश्मिरी दम आलू तयार आहे! हा दम आलू तुम्ही जिरा राईस, नान, पराठा किंवा पुरीसोबत सर्व्ह करू शकता.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीचीपूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik