कोथिंबिरीची वडी
साहित्य: निवडून स्वच्छ धुतलेली व चिरलेली कोथिंबीर 1 कप भरून, बेसन 1 कप व 2 चमचा तांदळाची पिठी, 5 हिरव्या मिरच्या, 1 तुकडा आलं, जाडसर वाटून, हळद, हिंग, मीठ एक चमचा साखर, 1 चमचा लिंबाचा रस, 2 चमचा तेल.
कृती: चिरलेली कोथिंबीर ओलसर असावी. त्यात मीठ, साखर, लिंबाचा रस घाला. थोडं पाणी सुटल्यावर हिंग, हळद, तेल, वाटलेलं आलं इत्यादी सर्व घाला. मावेल तेवढंच पीठ घालून हलक्या हाताने मळून घ्या. एखाद्या चौकोनी डब्यात किंवा थाळीत, तेलाचा हात लावून अर्धा इंच जाड थापा. पीठ फार घट्ट असू नये. ढोकळ्याप्रमाणे वाफवून घ्या. गार झाल्यावर तळा. वाफविण्यापूर्वी थोडी खसखस वर भुरभुरावी. काहीवेळा वडी तळताना तुटतात. तेव्हा कॉर्नफ्लॉवर व पाण्याची पातळ पेस्ट बनवून त्यात वडी बुडवून तळा.
