अंधेरी भागात एका ३० वर्षीय मॉडेलनं हॉटेलच्या खोलीत पंख्याला लटकून स्वत:चा जीव दिला
मुंबईच्या अंधेरी भागात एका ३० वर्षीय मॉडेलनं हॉटेलच्या खोलीत पंख्याला लटकून स्वत:चा जीव दिला आहे. वर्सोवा पोलीस ठाण्यात याबाबत गुन्हा नोंदवण्यात आला आहे. सध्या पोलीस आत्महत्येचा तपास करत आहेत. मिळालेल्या माहितीनुसार, बुधवारी दुपारी १ वाजता मॉडेलनं हॉटेलमध्ये चेक इन केले होते. त्यानंतर रात्री तिने जेवणासाठी ऑर्डर दिली. मात्र दुसऱ्या दिवशी सकाळी तिचा मृत्यू झाल्याची धक्कादायक घटना समोर आली. या मॉडेलचं नाव आकांक्षा मोहन असून ती लोखंडवाला येथे यमुनानगर सोसायटीत राहायची.
हॉटेलच्या वेटरने मॉडेलच्या रुमची घंटी वाजवली. त्याने अनेकदा आवाज देऊनही आतून काहीच प्रतिसाद मिळाला नाही. त्यानंतर वेटरने याबाबत वरिष्ठांना कळवलं. हॉटेल मॅनेजरने पोलिसांना कॉल करत माहिती दिली. त्यानंतर तातडीने पोलिसांनी घटनास्थळी पोहचत हॉटेलच्या रुमची चावी घेत दरवाजा उघडला. त्यानंतर आतील दृश्य पाहून पोलिसांसह हॉटेल कर्मचारी हादरले. या मॉडेलने पंख्याला लटकून आत्महत्या केल्याचं प्रथम दर्शनी दिसले.
Edited By - Ratandeep Ranshoor
