मुंबई कोस्टल रोडवर बीएमडब्ल्यू गाडी बॅरियरला तोडून खाली पडली; तीन विद्यार्थ्यांचा मृत्यू; एक गंभीर जखमी
मुंबई कोस्टल रोडवर बीएमडब्ल्यू गाडी बॅरियरला तोडून खाली पडली यात तीन विद्यार्थ्यांचा मृत्यू झाला असून एक जण गंभीर जखमी आहे.
मिळालेल्या माहितीनुसार रविवारी पहाटे ५:२० च्या सुमारास मुंबईच्या कोस्टल रोडवर एका बीएमडब्ल्यू गाडीचा अपघात झाला. पोलिसांनी दिलेल्या माहितीनुसार, ही गाडी मरीन ड्राईव्हकडून हाजी अलीच्या दिशेने जात होती आणि लोटस जेट्टीजवळ बांधकाम सुरू असलेल्या पार्किंग लॉटमध्ये घुसली. वळणावर बाहेरील बॅरियरला तोडून खाली पडली या अपघातात तीन विद्यार्थ्यांचा मृत्यू झाला, तर एक जण गंभीर जखमी आहे.
पोलिसांच्या प्राथमिक तपासानुसार, गाडीच्या अतिवेगामुळे चालकाला वळणाचा योग्य अंदाज आला नाही. सीसीटीव्ही फुटेजवरून असे दिसून येते की, अपघाताच्या वेळी गाडी भरधाव वेगात होती. अपघातानंतर, कारमधील चौघांनाही तात्काळ जवळच्या बीएमसी-संचालित नायर रुग्णालयात दाखल करण्यात आले. डॉक्टरांनी शनाया गज्जल (२१), आदित्य जक्सानिया (२०) आणि धीर्या सेठ (१७) यांना मृत घोषित केले. तर आदित्य ओसवाल याला गंभीर अवस्थेत रुग्णालयाच्या ट्रॉमा वॉर्डमध्ये दाखल करण्यात आले आहे. त्याची प्रकृती गंभीर असून त्याच्यावर उपचार सुरू आहे. पोलिसांच्या माहितीनुसार, अपघातात सामील असलेले चारही तरुण-तरुणी मूळचे अहमदाबादचे होते. अपघातात सामील असलेली बीएमडब्ल्यू कार गज्जलच्या कुटुंबाची असल्याचे मानले जात आहे.
