सर्वोच्च न्यायालयाच्या पहिल्या महिला न्यायाधीशांचे निधन
सर्वोच्च न्यायालयाच्या पहिल्या महिला न्यायाधीश आणि तामिळनाडूच्या माजी राज्यपाल फातिमा बीवी यांचे निधन झाले. वयाच्या 96 व्या वर्षी त्यांनी अखेरचा श्वास घेतला.
(दिवंगत) न्यायमूर्ती फातिमा बीवी यांनी त्यांच्या दीर्घ आणि गौरवशाली कारकिर्दीत देशभरातील महिलांसाठी आदर्श म्हणून काम केले आहे. फातिमा बीवीचे नाव केवळ न्यायव्यवस्थेतच नाही तर देशाच्या इतिहासात सुवर्णाक्षरांनी कोरले गेले आहे.
फातिमा बीवी या तामिळनाडूच्या माजी राज्यपालही राहिल्या आहेत. सर्वोच्च न्यायालयाचे न्यायमूर्ती म्हणून काम केल्यानंतर त्यांनी तामिळनाडूच्या राज्यपालपदी नियुक्ती करून राजकीय क्षेत्रातही आपली छाप सोडली.
केरळमधील पंडालम येथील रहिवासी असलेल्या बीवी फातिमा यांनी पथनामथिट्टा येथील कॅथोलिक हायस्कूलमध्ये आपले शालेय शिक्षण पूर्ण केले होते. नंतर त्यांनी तिरुअनंतपुरम कॉलेजमधून बॅचलर ऑफ सायन्सची पदवी मिळवली. त्यांनी सरकारी विधी महाविद्यालयातून कायद्याची पदवी प्राप्त केली आणि 14 नोव्हेंबर 1950 रोजी त्यांची वकील म्हणून नोंदणी झाली.
कोणत्याही उच्च न्यायव्यवस्थेत नियुक्त झालेल्या त्या पहिल्या मुस्लिम महिला न्यायाधीश होत्या. याशिवाय आशिया खंडातील सर्वोच्च न्यायालयाच्या पहिल्या महिला न्यायाधीशाची पदवीही त्यांच्या नावावर आहे. फातिमा बीवी 1989 मध्ये सर्वोच्च न्यायालयाची महिला न्यायाधीश बनणार्‍या पहिल्या भारतीय महिला ठरल्या.
तामिळनाडूच्या राज्यपालपदी नियुक्त होण्यापूर्वी, फातिमा बीवी यांना 3 ऑक्टोबर 1993 रोजी राष्ट्रीय मानवाधिकार आयोग (भारत) चे सदस्य बनवण्यात आले. याशिवाय त्यांनी राज्यपालपदाच्या कार्यकाळात तामिळनाडू विद्यापीठाचे कुलपती म्हणूनही काम केले.
