लाचखोरी प्रकरणातील न्यायालयातून चिखलीकरची फाईल गायब
महाराष्ट्रात खळबळ उडवून देणाऱ्या लाचखोर सतीश चिखलीकर प्रकरणात मोठा प्रकार उघड झाला आहे. या लाचप्रकरणातील खटल्याची मूळ तक्रार फाईलच जिल्हा सत्र न्यायालयातून संशयास्पदरित्या हरवली आहे. तर या फाईलच्या जागी न कोणत्याही साक्षीदार, तक्रारदाराची सही नसलेली बनावट तक्रार कागदपात्रांमध्ये दाखल झाली आहे. त्यातील काही मजकूरही बदलल्याचं समोर आले असून मोठी खळबळ उडाली आहे. जिल्हा न्यायालयानेही गंभीर दखल घेतली आहे.
नाशिक सार्वजनिक बांधकाम विभागात कार्यकारी अभियंता पदावर कार्यरत होते, त्यावेळी 2 मे 2013 रोजी एका तक्रारदाराकडून 22 हजारांची लाच स्वीकरतांना लाचलुचपत विभागाने त्यांना रंगेहाथ अटक केली होती.
चिखलीकरकडे दागिने आणि रोकड अशी सुमारे 17 कोटींची मालमत्ता मिळाली होती. तसेच राज्यभरात त्याची जवळपास 78 ठिकाणी मालमत्ता आढळून आली होती. त्यामुळे या प्रकरणाला मोठे महत्व प्राप्त झाले होते.
