लासलगाव येथे महिलेला जाळण्याचा प्रयत्न, पीडिता ४० टक्के भाजली
हिंगणघाट प्रकरणातून महाराष्ट्र सावरत नाही तोपर्यंत लासलगावमध्येही महिलेला जाळण्याचा प्रकार समोर आला आहे. लासलगाव येथे एका बसस्टॉपवर उभ्या असलेल्या महिलेला ४ ते ५ मुलांनी पेट्रोल टाकून जाळण्याचा प्रयत्न केला आहे. ही महिला ४० टक्के भाजली आहे. दरम्यान, आरोपी रामेश्वर भागवत याला ताब्यात घेण्यात आले आहे.
दोनच आठवड्यांपूर्वी हिंगणघाट येथे एका तरुणीला भरचौकात पेटवण्यात आले होते. ती ४० टक्के भाजली होती. आठवडाभर मृत्यूशी झुंज देऊन तिची प्राणज्योत मालवली. आता पुन्हा असाच प्रकार लासलगाव येथे घडला आहे. त्यामुळे महाराष्ट्र खरंच महिलांसाठी सुरक्षित राहिला आहे का असा प्रश्न विचारला जात आहे. लासलगाव येथे एका महिलेला बस स्टॉपवर ४ ते ५ तरुणांनी पेट्रोल ओतून जाळण्याचा प्रयत्न केला आहे. या घटनेत महिला ४० टक्के भाजली आहे. पीडित महिला ही लासलगाव जवळील पिंपळगाव नजीकच्या गावात राहणारी आहे. या महिलेला नाशिकच्या जिल्हा रुग्णालयामध्ये दाखल केलं आहे. या प्रकरणी पोलिसांनी एका संशयित तरुणाला ताब्यात घेतलं आहे. पोलीस फरार तरुणांचा शोध घेत आहे.
