सेरेनाने मागितली शारापोव्हाची माफी
अमेरिकेची अव्वल क्रमांकाची टेनिसपटू सेरेना विलिअम्स हिने रशियाची जगात तिसर्‍या स्थानावर असलेली मारिया शारापोव्हा हिची माफी मागितली आहे.सोमवारपासून सुरू झालेल्या विम्बल्डन खुल्या ग्रँडस्लॅम टेनिस स्पर्धेत महिला एकेरीतील या दोघी एकमेकांच्या कट्टर प्रतिस्पर्धी आहेत. सेरेनाने रोलिंग स्टोन मासिकामध्ये शारापोव्हाविषयी व्यक्तिगत अशी टीका टिप्पणी केली होती. या मजकुरात शारापोव्हाचे बल्गेरियन खेळाडू ग्रीगोर दिमीत्रोव्ह याच्याशी संबंध असल्याचे लिहिले होते. वादग्रस्त निकालानंतर शारापोव्हानेही विलिअम्सवर जोरदार टीका केली होती व सेरेनासुध्दा विवाहित पुरूषांशी संबंध ठेवून आहे, असा आरोप केला होता. त्यानंतर सेरेनाने शारापोव्हाची माफी मागितली. 16 ग्रँडस्लॅम जिंकणारी सेरेना ही सहावे विम्बल्डन आणि सतरावे ग्रँडस्लम जिंकण्याच्या तयारीत आहे. या तयारीवर वादाचा परिणाम होऊ नये, म्हणून तिने वादातून माघार घेतली आहे.
