रविवार, 4 डिसेंबर 2022
  1. मराठी बातम्या
  2. क्रिकेट मराठी
  3. क्रिकेट वृत्त
Written By
Last Modified रविवार, 28 नोव्हेंबर 2021 (16:00 IST)

IND vs NZ: श्रेयस अय्यरने न्यूझीलंडविरुद्ध इतिहास रचला, पदार्पणाच्या सामन्यात शतक आणि अर्धशतक करणारा पहिला भारतीय खेळाडू

कानपूरच्या ग्रीन पार्क स्टेडियमवर खेळल्या जात असलेल्या न्यूझीलंडविरुद्धच्या कसोटी मालिकेतील पहिल्या सामन्यात भारतीय फलंदाज श्रेयस अय्यरने इतिहास रचला आहे. पदार्पणाच्या सामन्यातच शतक आणि अर्धशतक झळकावणारा श्रेयस आता पहिला भारतीय फलंदाज ठरला आहे. भारताकडून कसोटी क्रिकेटमध्ये असे दोन फलंदाज झाले आहेत, ज्यांनी पदार्पणाच्या कसोटीच्या दोन्ही डावात अर्धशतके झळकावली, पण शतकाशिवाय कोणीही अर्धशतक करू शकले नाही. त्यात दिलावर हुसेन आणि महान फलंदाज सुनील गावस्कर यांच्या नावाचा समावेश आहे. दिलावरने 1933-34 मध्ये इंग्लंडविरुद्ध कोलकाता कसोटीत पदार्पण केले, पहिल्या डावात ५९ आणि दुसऱ्या डावात ५७ धावा केल्या. याशिवाय गावस्कर यांनी 1970-71 मध्ये पोर्ट ऑफ स्पेन येथे वेस्ट इंडिजविरुद्ध 65 आणि नाबाद 67 धावांची खेळी खेळली होती. 
51 धावांच्या धावसंख्येवर पाच विकेट्स गमावल्यानंतर संघ संघर्ष करत असल्याचे दिसत असताना अय्यरने येथे भारतीय डाव सांभाळला. त्याने 65 धावांच्या खेळीत आठ चौकार आणि एक लांब षटकार लगावला. श्रेयसने आर अश्विनसोबत सहाव्या विकेटसाठी 52 आणि यष्टीरक्षक-फलंदाज रिद्धिमान साहासोबत सातव्या विकेटसाठी 64 धावांची भागीदारी केली. या दोन भागीदारीच्या जोरावर भारत संकटातून बाहेर पडू शकला आहे.
या सामन्याच्या पहिल्या डावात श्रेयसने शतक झळकावत इतिहास रचला. श्रेयस आपल्या पदार्पणाच्या कसोटीत किवीजविरुद्ध 105 धावा करून शतक झळकावणारा 16वा भारतीय फलंदाज ठरला. या यादीत लाला अमरनाथ, गुंडप्पा विश्वनाथ, सौरव गांगुली आणि रोहित शर्मा यांसारख्या दिग्गजांच्या नावांचा समावेश आहे. भारतासाठी लाला अमरनाथ हे पहिले होते, ज्यांनी 1933 मध्ये मुंबईत खेळल्या गेलेल्या कसोटी सामन्यात इंग्लंडविरुद्ध 118 धावा केल्या होत्या. त्याच्यापाठोपाठ दीपक शोधन (110), एजी कृपाल सिंग (नाबाद 100), अब्बास अली बेग (112), हनुमंत सिंग (105), गुंडप्पा विश्वनाथ (137), सुरिंदर अमरनाथ (124), मोहम्मद अझरुद्दीन (110), प्रवीण अमरे (103), सौरव गांगुली (131), वीरेंद्र सेहवाग (105), सुरेश रैना (120), शिखर धवन (187), रोहित शर्मा (177) आणि पृथ्वी शॉ (134) यांनीही ही कामगिरी केली आहे.