पाटणाच्या गांधी मैदान बॉम्बस्फोट प्रकरणी चार दोषींना फाशी, दोघांना जन्मठेपेची शिक्षा

27 ऑक्टोबर 2013 रोजी पाटणा येथील ऐतिहासिक गांधी मैदानावर झालेल्या मालिका बॉम्बस्फोट प्रकरणात NIA न्यायालयाने शिक्षा जाहीर केली. न्यायालयाने सर्व 9 दोषींना शिक्षा सुनावली आहे. चार दोषींना फाशीची शिक्षा सुनावण्यात आली आहे. दोन दोषींना जन्मठेपेची शिक्षा झाली. दोन दोषींना 10 वर्षांची तर एका दोषीला सात वर्षांची शिक्षा सुनावण्यात आली आहे.

या प्रकरणी इम्तियाज अन्सारी, हैदर अली, नवाज अन्सारी, मुझमुल्ला, उमर सिद्दीकी, अझहर कुरेशी, अहमद हुसैन, फिरोज अस्लम, इफ्तेखार आलम यांना दोषी ठरवण्यात आले आहे. या प्रकरणी 27 ऑक्टोबर रोजी न्यायालयाने त्यांना दोषी ठरवले होते. न्यायालयाने एक आरोपी वगळता सर्व नऊ जणांना दोषी ठरवले होते. पुराव्याअभावी न्यायालयाने फकरुद्दीनची सुटका केली होती.

गुजरातचे तत्कालीन मुख्यमंत्री आणि पंतप्रधानपदाचे उमेदवार नरेंद्र मोदी (सध्याचे पंतप्रधान) यांचा पाटणा येथील गांधी मैदानावर हुंकार रॅलीचा कार्यक्रम होता. त्यामुळे गांधी मैदान व परिसरात मोठी गर्दी झाली होती. रेल्वेने लोक मोठ्या संख्येने येत होते. पाटणा जंक्शन ते गांधी मैदानापर्यंत जनसमुदाय उपस्थित होता. पहिला स्फोट पाटणा जंक्शनच्या प्लॅटफॉर्म क्रमांक 10 वर सकाळी 9.30 च्या सुमारास झाला. या स्फोटात एकाचा जागीच मृत्यू झाला. त्याचवेळी धर्मा कुलीने पळणाऱ्या एका व्यक्तीला पकडले. अटक करण्यात आलेल्या व्यक्तीने नंतर चौकशीदरम्यान कबूल केले की तो दहशतवादी इम्तियाज होता आणि त्याच्या कमरेभोवती एक शक्तिशाली बॉम्ब बांधला होता.

इम्तियाजला अटक केल्यानंतर त्याची चौकशी सुरू असताना त्याच्या साथीदारांनी गांधी मैदानात एकामागून एक स्फोट सुरू केले. त्यावेळी हुंकार सभेला नरेंद्र मोदी संबोधित करत होते. एकूण 7 मालिका बॉम्बस्फोटात सहा जण ठार तर 87 जखमी झाले.