ईडी पान तंबाखूच्या दुकानासारखे झालं आहे- प्रणिती शिंदे
"ईडी (ED) म्हणजे पान तंबाखूच्या दुकानासारखे झालं आहे. भाजप सरकारच्या काळात ईडी, सीबीआय सारख्या स्वायत्त संस्थांचा वापर हा राजकारणासाठी केला जात आहे. भाजपच्या विरोधात बोललात तर केव्हाही ईडीची धाड पडू शकते. ती माझ्या घरीही पडू शकते," अशी टीका काँग्रेस आमदार प्रणिती शिंदे यांनी केली आहे.
ज्या लोकांनी शेतकऱ्यांना मारलंय ते लोक आज खुशाल बाहेर फिरतायत आणि निर्दोष लोक जेलमध्ये आहेत, भाजपची लोक केवळ आग लावण्याचं काम करत आहेत, असंही प्रणिती यांनी म्हटलं.
त्या सोलापुरातील एका सभेत बोलत होत्या.
आमदार प्रणिती शिंदे यांनी म्हटलं, "भाजपमुळे देशातील सामाजिक वातावरण बिघडलं आहे. देशात सर्वत्र भीतीचं वातावरण निर्माण झालं आहे. या भीतीमुळेच सर्वजण घरात बसले आहेत. आज मी यांच्या विरोधात बोलतेय तर माझ्या घरीही ईडीची धाड पडू शकते. ईडी म्हणजे पान-तंबाखूचं दुकान झालंय. कुणाच्याही घरात घुसतात आणि लोकांना उचलून नेतात."
