चहासोबत हे पदार्थ खाणे आरोग्यासाठी धोकादायक

आपल्याकडे चहाप्रेमींची संख्या अथांग आहे. सकाळी उठल्यापासून ते संध्याकाळच्या थकव्यापर्यंत चहाचा एक घोट घ्यायला सर्वांनाच आवडतो. चहासोबत भजी, बिस्किटे किंवा काहीतरी चटपटीत खाणे हा तर अनेकांचा रोजचा नियम असतो.पण तुम्हाला माहिती आहे का? आयुर्वेदानुसार आणि आधुनिक विज्ञानानुसार, चहासोबत काही विशिष्ट पदार्थ खाणे आरोग्यासाठी अत्यंत हानिकारक ठरू शकते. या चुकीच्या संयोजनामुळे  पोटाचे विकार, ॲसिडिटी आणि त्वचाविकार उद्भवू शकतात. आज आपण चहासोबत चुकूनही खाऊ नयेत असे पदार्थ पाहणार आहोत 

चहासोबत टाळायचे मुख्य पदार्थ

१. बेसन किंवा तळलेले पदार्थ (भजी, समोसे, शेव):

पाऊस पडू लागला की चहा-भजीचे समीकरण ठरलेले असते. मात्र, बेसन आणि चहाचे हे कॉम्बिनेशन पचनसंस्थेसाठी अत्यंत घातक आहे. बेसनामुळे चहातील पोषक घटक शरीरात शोषले जात नाहीत. यामुळे अपचन, गॅसेस, पोट फुगणे आणि तीव्र ॲसिडिटी होऊ शकते.

२. लिंबू किंवा आंबट पदार्थ :

अनेक लोक वजन कमी करण्यासाठी किंवा चवीसाठी 'लेमन टी' पितात. परंतु, चहाच्या पानात असणारे घटक आणि लिंबाचा रस एकत्र आल्यास पोटात जास्त प्रमाणात ॲसिड तयार होते. यामुळे छातीत जळजळ, उलट्या होणे किंवा गॅस्ट्रिक समस्या उद्भवू शकतात.

३. हळद असलेले पदार्थ:

हळदीमध्ये औषधी गुणधर्म असतात, पण चहा आणि हळद यांचे अजिबात पटत नाही. चहाच्या पानांमधील रासायनिक घटक आणि हळदीतील 'कर्करोग प्रतिबंधक' घटक  एकत्र आल्यास रासायनिक प्रक्रिया होते. यामुळे बद्धकोष्ठता आणि पोटाचे गंभीर आजार होऊ शकतात. 

४. थंड पदार्थ : 

गरमागरम चहा पिण्यापूर्वी किंवा प्यायल्यानंतर लगेचच थंड पाणी, आईस्क्रीम किंवा कोणतेही थंड पेय पिणे टाळावे. तापमानातील या अचानक बदलामुळे पचनक्रिया मंदावते आणि दात संवेदनशील होतात. तसेच यामुळे घशाचे संसर्ग आणि सर्दी-खोकला होऊ शकतो.  

५. हिरव्या पालेभाज्या आणि लोहयुक्त अन्न : 

चहामध्ये 'टॅनिन्स' आणि 'ऑक्सलेट्स' नावाचे घटक असतात. जेव्हा तुम्ही चहासोबत लोहयुक्त पदार्थ जसे की सुकामेवा, हिरव्या पालेभाज्या किंवा मोड आलेली कडधान्ये खाता, तेव्हा चहातील घटक शरीराला हे लोह शोषून घेण्यापासून रोखतात. यामुळे शरीरात रक्ताची कमतरता भासू शकते.

महत्त्वाचा सल्ला: चहा पिण्यापूर्वी आणि नंतर किमान ३० ते ४० मिनिटांचे अंतर राखूनच इतर पदार्थांचे सेवन करावे. रिकाम्या पोटी कडक चहा पिण्याऐवजी आधी एक ग्लास कोमट पाणी पिणे नेहमीच फायदेशीर ठरते.

अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik