पंतप्रधान नरेंद्र मोदी 19 फेब्रुवारी रोजी पुन्हा एकदा महाराष्ट्राचा दौरा करणार
पंतप्रधान नरेंद्र मोदी 19 फेब्रुवारी रोजी पुन्हा एकदा महाराष्ट्राचा दौरा करणार आहेत. ते या दिवशी मुंबईत तयार होत असलेल्या कोस्टल रोडच्या पहिल्या टप्प्याचे उद्घाटन करणार आहेत.
बृहन्मुंबई महानगरपालिकेने (BMC) यासंदर्भात माहिती दिली आहे. मुंबईचा ड्रीम प्रोजेक्ट असलेला कोस्टल रोड अंतिम टप्प्यात आला असून त्याचा पहिला टप्पा फेब्रुवारीच्या मध्यापर्यंत सुरू होईल. तो सुरू झाल्यानंतर मुंबईकरांना वाहतुकीपासून दिलासा मिळणार आहे.
कोस्टल रोड तयार झाल्यानंतर 10 किलोमीटरहून अधिकचा प्रवास अवघ्या 10-12 मिनिटांत करता येईल. कोस्टल रोडची एकूण लांबी 29.2 किलोमीटर असून त्याचे काम दोन टप्प्यात केले जात आहे.
अशा परिस्थितीत तो बनवल्यानंतर 30 ते 40 मिनिटांचा वेळ वाचणार आहे. पहिल्या टप्प्यात 10.58 किलोमीटरचा पूल बांधला जात आहे. तर 2.4 किमी लांबीचा सागरी बोगदा बांधण्यात आला आहे.
एकूण 13,898 कोटी रुपयांच्या प्रकल्पात आतापर्यंत 9,383 कोटी रुपयांची कामे झाली असून अंदाजानुसार, या किनारी रस्त्याचे 84 टक्क्यांहून अधिक काम पूर्ण झाले आहे.
भारतातील अशा प्रकारचा हा पहिला बोगदा आहे, जो समुद्राखाली बांधण्यात आला आहे. हा बोगदा 40 फूट रुंद आहे. कोस्टल रोडची एक लेन लवकरच सुरू करण्याची तयारी सुरू आहे. सुमारे 14 हजार कोटी रुपये खर्चून बांधण्यात येत असलेल्या कोस्टल रोडचा पहिला टप्पा वरळी ते मरीन ड्राईव्हपर्यंत जाणार आहे. मरीन ड्राईव्ह ते प्रियदर्शनी पार्कपर्यंत दोन बोगदे आहेत. संपूर्ण दक्षिण कोस्टल रोड प्रकल्पासाठी 12,700 कोटी रुपये खर्च येणार आहे.
कोस्टल रोड प्रकल्पात तीन इंटरचेंज आहेत. पहिला इंटरचेंज इमर्सन गार्डन, दुसरा इंटरचेंज हाजी अली आणि तिसरा इंटरचेंज वरळी याठिकाणी आहे. इंटरचेंज दरम्यान पार्किंग व्यवस्था भूमिगत असेल, ज्याठिकाणी 1600 वाहने पार्क केली जातील. संपूर्ण रस्ता आठ पदरी, तर बोगद्याचा मार्ग सहा पदरी असणार आहे. इतर संबंधित प्रकल्पांमध्ये गार्डन सायकल ट्रॅक आणि जॉगिंग ट्रॅकचे बांधकाम समाविष्ट आहे.
पादचाऱ्यांना सहज रस्ता ओलांडता यावा, यासाठी 10 किमी रस्त्यावर 16 अंडरपास बांधण्यात आले आहेत. बोगद्यात काही दुर्घटना घडल्यास तत्काळ मदतीचीही व्यवस्था करण्यात आली आहे. यासाठी बीएमसीचा आपत्कालीन नियंत्रण कक्ष, मुंबई अग्निशमन दल, पोलीस आणि वाहतूक पोलीस यांच्याकडे बंदोबस्त ठेवण्यात येणार आहे.
Edited By - Ratnadeep ranshoor
