RCB v RR Match : राजस्थान रॉयल्सने रॉयल चॅलेंजर्स बंगळुरूला हरवून अव्वल स्थान पटकावले
रियान परागच्या झंझावाती अर्धशतकानंतर त्याच्या गोलंदाजांनी चमकदार कामगिरी केली कारण राजस्थान रॉयल्सने रॉयल चॅलेंजर्स बंगळुरूचा 29 धावांनी पराभव केला. आयपीएल 2022 (IPL) मधील राजस्थानचा हा सहावा विजय आहे . संजू सॅमसनच्या नेतृत्वाखालील राजस्थान संघ आठ सामन्यांत 12 गुणांसह गुणतालिकेत अव्वल स्थानावर पोहोचला आहे. रॉयल चॅलेंजर्सचा नऊ सामन्यांमधील हा सहावा पराभव आहे.
राजस्थानने दिलेल्या 145 धावांच्या लक्ष्याचा पाठलाग करताना आरसीबी संघ 19.3 षटकांत केवळ 115 धावाच करू शकला. त्याच्याकडून कर्णधार फाफ डू प्लेसिसने सर्वाधिक 23 धावा केल्या. विराट कोहलीला सलामीला पाठवण्याचा आरसीबीचा निर्णय योग्य ठरला नाही. कोहली 9 धावा करून पॅव्हेलियनमध्ये परतला. त्याला प्रसिद्ध कृष्णाने रियान परागच्या हाती झेलबाद केले.
विराट कोहली सलामीला 10 धावा करून बाद झाला
10 धावांवर विराटची विकेट गमावल्यानंतर आरसीबीला 37 धावांवर आणखी दोन धक्के बसले. कर्णधार फाफ डू प्लेसिसने 23 धावा केल्या. कुलदीप सेनने पुढच्याच चेंडूवर ग्लेन मॅक्सवेलला देवदत्त पडिकलकरवी झेलबाद करून आपला दुसरा बळी पूर्ण केला. रजत पाटीदार 16 धावांवर अश्विनच्या गोलंदाजीवर, तर सुयश प्रभुदेसाईला अश्विनने परागच्या हाती झेलबाद केले.
दिनेश कार्तिक सहा धावा करून धावबाद झाला. शाहबाज अहमदने 17 धावा केल्या. अश्विनच्या चेंडूवर तो रियान परागकरवी झेलबाद झाला. 18 धावांवर कुलदीप सेनने वनिंदू हसरंगाला त्याच्याच चेंडूवर झेलबाद केले. मोहम्मद सिराज 5 धावा करून बाद झाला. राजस्थानकडून आर अश्विनने तीन आणि कुलदीप सेनने चार तर प्रसिद्ध कृष्णाने दोन विकेट घेतल्या.
परागच्या अर्धशतकाच्या जोरावर राजस्थानने 8 बाद 144 धावा केल्या.
रॉयल चॅलेंजर्स बंगळुरूच्या तगड्या गोलंदाजीदरम्यान रियान परागने नाबाद अर्धशतक झळकावले, परंतु असे असतानाही राजस्थान रॉयल्सला त्यांच्या दिग्गज फलंदाजांच्या अपयशामुळे 8 विकेट्सवर 144 धावाच करता आल्या. परागने 31 चेंडूंत तीन चौकार आणि चार षटकारांसह नाबाद 56 धावा केल्या.
कर्णधार संजू सॅमसनने 21 चेंडूत 27 धावा केल्या मात्र त्याच्या बेजबाबदार फटक्याने संघाला बॅकफूटवर आणले. मधल्या 44 चेंडूपर्यंत एकही चौकार किंवा षटकार नव्हता पण परागच्या प्रयत्नांमुळे अखेरच्या दोन षटकांत 30 धावा झाल्या. जोश हेझलवूड (19/2), वानिंदू हसरंगा (23/2) आणि मोहम्मद सिराज (30/2) हे आरसीबीसाठी सर्वात यशस्वी गोलंदाज होते परंतु त्यांचे क्षेत्ररक्षण चांगले नव्हते. हसरंगाने वैयक्तिक 32 धावांवर परागला जीवदान दिले.
