महाराष्ट्र दुष्काळाच्या विळख्यात! कमी पावसामुळे २० जिल्ह्यांमध्ये संकट अधिक गडद
कमी पावसामुळे महाराष्ट्रातील २० जिल्ह्यांमध्ये दुष्काळ अधिक गडद झाला आहे. मराठवाड्यातील पिके नष्ट झाली असून, पाणी आणि चाऱ्याच्या तीव्र टंचाईमुळे शेतकऱ्यांवर स्थलांतराचा धोका निर्माण झाला आहे.
महाराष्ट्रावर यावर्षीही दुष्काळाचे संकट आहे. राज्यातील ३६ पैकी २० जिल्ह्यांमध्ये सरासरीपेक्षा खूपच कमी पाऊस झाल्यामुळे अनेक भागांतील उभी पिके दुष्काळाच्या गर्तेत सापडली आहे. अनेक जिल्ह्यांतील शेतकऱ्यांसमोर चिंतेचे वातावरण आहे. सर्वात गंभीर चित्र मराठवाड्यातून समोर येत आहे. २० सप्टेंबरपर्यंत, या भागातील आठ जिल्ह्यांमध्ये पावसाचे प्रमाण सरासरीपेक्षा केवळ ६० ते ६५ टक्के होते आणि जलाशयांमधील पाणीसाठा सुमारे ५० टक्क्यांपर्यंत कमी झाला आहे. दीर्घकाळच्या दुष्काळामुळे सोयाबीन, कापूस, मका, तूर आणि मूग यांसारख्या पिकांवर परिणाम झाला आहे. कृषी विभागाच्या अधिकाऱ्यांच्या मते, अनेक भागांतील उभ्या पिकांचे मोठे नुकसान झाले आहे.
महाराष्ट्राचे परिवहन मंत्री आणि धाराशिवचे पालकमंत्री प्रताप सरनाईक यांनी शेतकऱ्यांची भेट घेतली आणि पिकांची अवस्था पाहून चिंता व्यक्त केली.
एल निनोच्या धोक्यासाठी सरकार सतर्क
अनिश्चित हवामानामुळे सर्वांची चिंता वाढली आहे. तज्ञ आणि सरकारी यंत्रणा एल निनोसारख्या हवामान परिस्थितीच्या संभाव्य परिणामांवर सतत लक्ष ठेवून आहे. केंद्र सरकारने, महाराष्ट्रासह कृषी क्षेत्रावर एल निनोच्या संभाव्य परिणामावर लक्ष ठेवण्यासाठी हवामान आणि कृषी संघटनांशी समन्वय साधल्याची माहिती दिली आहे. तसेच शासनाने बाधित भागांमध्ये तात्काळ मदत, पिण्याच्या पाण्याची व्यवस्था आणि पीक नुकसानीचे मूल्यांकन करण्याचे आदेश दिले आहे. अधिकृत नुकसान मूल्यांकन प्रक्रिया ५ ऑक्टोबरपासून सुरू होणार आहे, परंतु राज्य सरकारने त्यापूर्वीच बाधित शेतकऱ्यांना मदत देण्याचे निर्देश दिले आहे.
Edited By- Dhanashri Naik
