पुदिना आपल्या जेवणाला एक अप्रतिम सुवास आणि ताजेपणा देतो. तसेच पुदिना शरीराला थंडावा देण्यासाठी खूप फायदेशीर ठरतो. पुदिन्यापासून बनवता येणारे ५ सोपे आणि स्वादिष्ट पदार्थ आज आपण पाहणार आहोत जे तुम्ही सहज बनवू शकतात.
पुदिना पराठा
लहान मुलांना रोजच्या चपातीपेक्षा काहीतरी वेगळं आणि पौष्टिक खायचं असेल, तर हा पराठा नक्की बनवा.
साहित्य: गव्हाचे पीठ, वाळवलेल्या पुदिन्याची पूड (किंवा बारीक चिरलेला पुदिना), तिखट, जिरे आणि तूप.
कृती: पिठाची लाटी लाटून त्यावर तूप लावा. मग त्यावर पुदिना पूड, थोडे तिखट आणि मीठ भुरभुरा. त्याची घडी घालून (लच्छा पराठ्यासारखा) पुन्हा लाटा आणि तव्यावर तूप लावून खरपूस भाजा.
सुगंधी पुदिना राईस (पुलाव)
अचानक आलेल्या पाहुण्यांसाठी किंवा टिफिनसाठी हा एक झटपट आणि चवदार पर्याय आहे.
साहित्य: बासमती तांदूळ, पुदिना, कोथिंबीर, हिरवी मिरची, आले-लसूण पेस्ट, आणि खडे मसाले.
कृती: पुदिना, कोथिंबीर आणि मिरचीची पेस्ट बनवा. कढईत तेल/तूप गरम करून खडे मसाले आणि कांदा परतून घ्या. त्यात पुदिना पेस्ट, आले-लसूण पेस्ट आणि शिजवलेला भात घालून एकत्र करा. ५ मिनिटे वाफ येऊ द्या.
रिफ्रेशिंग लेमन-मिंट मॉकटेल
घरच्या घरी हॉटेलसारखे मॉकटेल बनवून तुम्ही पाहुण्यांना सरप्राईज देऊ शकता.
साहित्य: पुदिन्याची पाने, लिंबाचा रस, साखर किंवा मध, चाट मसाला, सोडा किंवा थंड पाणी, आणि बर्फ.
कृती: एका पेल्यात पुदिन्याची पाने आणि लिंबाचे तुकडे हलकेच ठेचून घ्या. त्यात साखर, चाट मसाला, बर्फाचे तुकडे आणि सोडा (किंवा पाणी) घालून मिक्स करा.
चटपटीत पुदिना चटणी
ही चटणी समोसे, भजी, ढोकळा किंवा अगदी रोजच्या जेवणासोबत तोंडी लावायला उत्तम पर्याय आहे.
साहित्य: पुदिना पाने, कोथिंबीर, हिरव्या मिरच्या, लसूण, जिरे, लिंबाचा रस, आणि मीठ.
कृती: सर्व साहित्य एकत्र करून मिक्सरमध्ये थोडे पाणी घालून गुळगुळीत वाटून घ्या. तुमची चमचमीत चटणी तयार!
थंडगार पुदिना ताक (मठ्ठा)
उन्हाळ्यात शरीराला थंडावा देण्यासाठी आणि पचनक्रिया सुधारण्यासाठी हे सर्वोत्तम पेय आहे.
साहित्य: दही, पुदिन्याची पाने, भाजलेले जिरे पूड, काळं मीठ, आणि साधे मीठ.
कृती: दही आणि पाणी एकत्र करून घुसळून घ्या. त्यात पुदिन्याची पाने बारीक वाटून किंवा चिरून टाका. वरून जिरे पूड आणि काळं मीठ घालून थंडगार सर्व्ह करा.
पुदिना नेहमी वापरण्यापूर्वी स्वच्छ धुवून घ्यावा, जेणेकरून त्यावरील माती निघून जाईल आणि पदार्थाला उत्तम चव येईल.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
Edited By- Dhanashri Naik
