मुंबईत मुसळधार पावसामुळे जन जीवन विस्कळीत, लोकल गाड्यांवरही परिणाम
पावसामुळे मुंबईतील जनजीवन विस्कळीत झाले आहे. शहरात अनेक ठिकाणी पाणी साचल्याने वाहतूक कोंडी आणि लोकल ट्रेनच्या प्रवासावरही परिणाम झाला आहे. प्रत्येक प्रकारचा धोका टाळण्यासाठी एनडीआरएफची टीम संपूर्ण शहरात तैनात करण्यात आली आहे. मुंबईत गेल्या 12 तासांपासून मुसळधार पाऊस पडत आहे.
पावसामुळे सार्वजनिक आणि खाजगी वाहतुकीवर परिणाम झाला आहे. शहरातील मुलुंड आणि मलबार हिल्स येथे सकाळी अवघ्या एका तासात 34 मिमी पावसाची नोंद झाली. मुंबईत गेल्या 24 तासात 135 मिमी पावसाची नोंद झाली आहे.
मानखुर्द, पनवेल आणि कुर्ला स्थानकांजवळ रेल्वे रुळांवर पाणी साचल्याने हार्बर मार्गावरील गाड्या 15 ते 20 मिनिटे उशिराने धावल्या. शहरातील अनेक भागात रस्त्यावर पाणी साचल्याने बसचे मार्ग बदलण्यात आले.
डीएन नगरमध्ये अंधेरी सबवे बंद करण्यात आला. दक्षिण मुंबईकडे जाणारी वाहने गोखले पुलावरून तर उत्तरेकडे जाणारी वाहने ठाकरे पुलावरून वळवण्यात आली. याशिवाय खार भुयारी मार्गही बंद ठेवण्यात आला होता. ट्रॉम्बेमध्ये महाराष्ट्र नगर भुयारी मार्ग बंद राहिला. मध्य मुंबईतील वडाळा आणि माटुंगा येथील रस्त्यांवर पाणी साचल्याने अनेक वाहने अडकून पडल्याचे या अधिकाऱ्याने सांगितले.
मुसळधार पावसाच्या सततच्या अंदाजामुळे एनडीआरएफच्या तीन तुकड्या मुंबईत तैनात आहेत. भारतीय हवामान खात्याने (IMD) शहरासाठी यलो अलर्ट जारी केला आहे. आयएमडीने शहर आणि उपनगरात मुसळधार पावसाची शक्यता वर्तवली आहे. भारतीय हवामान खात्याने (IMD) उत्तराखंडमध्ये 22 जुलैला मुसळधार पावसासाठी रेड अलर्ट आणि 23-25 जुलैला ऑरेंज अलर्ट जारी केला आहे. पश्चिम मध्य प्रदेश आणि गुजरात भागात 22 ते 23 जुलैपर्यंत रेड अलर्ट जारी करण्यात आला आहे. त्याचबरोबर छत्तीसगड, मध्य महाराष्ट्र आणि पश्चिम मध्य प्रदेशमध्ये 22 जुलै रोजी मुसळधार पावसाचा ऑरेंज अलर्ट जारी करण्यात आला आहे.
कोकण, गोवा आणि मध्य महाराष्ट्रात 24 जुलैपर्यंत, पूर्व आणि पश्चिम मध्य प्रदेशात 23-24 जुलै, गुजरात राज्यात 24-25 जुलै, पूर्व राजस्थान आणि हिमाचल प्रदेशात 22-23 जुलैपर्यंत अतिवृष्टीसाठी ऑरेंज अलर्ट जारी करण्यात आला आहे. .
Edited By- Priya Dixit
