पंतप्रधान मोदींच्या हस्ते ठाणे ते दिवा दरम्यानच्या 2 अतिरिक्त रेल्वे मार्गांचे उद्घाटन
पंतप्रधान नरेंद्र मोदी यांनी शुक्रवारी ठाणे आणि दिवा यांना जोडणाऱ्या 2 अतिरिक्त रेल्वे मार्गांना व्हिडिओ कॉन्फरन्सिंगद्वारे हिरवा झेंडा दाखवला. पंतप्रधान मोदींनी दोन्ही रेल्वे मार्ग ऑनलाइन देशाला समर्पित केले आणि मुंबई उपनगरीय रेल्वेच्या दोन उपनगरीय गाड्यांना हिरवा झेंडा दाखवला. यावेळी पीएम मोदी म्हणाले, 'ठाणे-दिवा दरम्यान नव्याने बांधलेल्या पाचव्या आणि सहाव्या रेल्वे मार्गाच्या लोकार्पणबद्दल प्रत्येक मुंबईकराचे खूप खूप अभिनंदन.
या कार्यक्रमाला संबोधित करताना पीएम मोदी पुढे म्हणाले, ही नवीन रेल्वे लाईन मुंबईतील लोकांच्या जीवनात मोठा बदल घडवून आणेल, त्यांच्या राहणीमानात वाढ करेल. या नव्या रेल्वे मार्गामुळे मुंबईच्या कधीही न संपणाऱ्या जनजीवनाला आणखी चालना मिळणार आहे. आजपासून मध्य रेल्वे मार्गावर 36 नवीन लोकल धावणार आहेत, त्यापैकी बहुतांश एसी लोकल आहेत. लोकलच्या सुविधांचा विस्तार, लोकलचे आधुनिकीकरण या केंद्र सरकारच्या बांधिलकीचा हा एक भाग आहे.
ते पुढे म्हणाले, स्वतंत्र भारताच्या प्रगतीत मुंबई महानगराचे मोठे योगदान आहे. आता आत्मनिर्भर भारत निर्माण करण्यासाठी मुंबईची क्षमता अनेक पटींनी वाढवण्याचे प्रयत्न सुरू आहेत. म्हणूनच मुंबईत 21व्या शतकातील पायाभूत सुविधा निर्माण करण्यावर आमचे विशेष लक्ष आहे. पीएम मोदी म्हणतात, 'पूर्वी पायाभूत सुविधांचे प्रकल्प वर्षानुवर्षे चालत होते कारण नियोजनापासून ते अंमलबजावणीपर्यंत समन्वयाचा अभाव होता.
'
