महाराष्ट्रातील आरोपीने मध्यप्रदेशात रेल्वेमधून उडी मारत केली आत्महत्या
मध्य प्रदेशातील मुरैना जीआरपी पोलीस स्टेशन हद्दीत रेल्वे रुळावर तरुणाचा मृतदेह आढळून आला. मृत अनिकेत जाधव हा महाराष्ट्राचा असल्याचे तपासात समोर आले असून, पोलिसांच्या तावडीतून सुटण्यासाठी त्याने रेल्वेच्या टॉयलेटमधून उडी मारली, ज्यामुळे त्याचा मृत्यू झाला. या प्रकरणी महाराष्ट्रातील ठाणे जिल्ह्यातील वाशिंद पोलीस ठाण्यात तैनात असलेल्या 3 पोलीस कर्मचाऱ्यांना निलंबित करण्यात आले आहे. अपहरण आरोप प्रकरणी दिल्ली येथून अटक केल्यानंतर वाशिंद पोलीस मयत तरुणाला राजधानी एक्स्प्रेसमधून ठाणे येथे घेऊन जात होते.
मिळालेल्या माहितीनुसार, महाराष्ट्रातील भिवंडी येथे राहणारा 25 वर्षीय अनिकेत जाधव याने शाहपूर भागातील एका 16 वर्षीय मुलीचे घरातून अपहरण करून तिला दिल्लीत आणले होते. याप्रकरणी मुलीच्या कुटुंबीयांनी वाशिंद पोलीस ठाण्यात अनिकेतविरुद्ध अपहरणाचा गुन्हा दाखल केला होता. वाशिंद पोलिसांनी तपास केला असता अनिकेत आणि तरुणीचे दिल्लीतील लोकेशन सापडले. मुलीचे कुटुंबीय आणि पोलिसांनी थेट दिल्ली गाठून मुलीसह आरोपी अनिकेत जाधवला ताब्यात घेतले.
मिळालेल्या माहितीनुसार 28 ऑगस्टच्या रात्री पोलीस अनिकेतला घेऊन राजधानी एक्स्प्रेसने मुंबईला निघाले. राजधानी एक्स्प्रेस मुरैना जिल्ह्याच्या सीमेवरून जात असताना अनिकेतने टॉयलेट करण्यासाठी बाथरूममध्ये प्रवेश केला आणि टॉयलेटची खिडकी तोडून चालत्या ट्रेनमधून उडी मारली. त्यामुळे त्याचा जागीच मृत्यू झाला. याप्रकरणी मुरैना जीआरपी पोलीस ठाण्याने मयत तरुणाचे पोस्टमोर्टम करून मृतदेह कुटुंबीयांच्या ताब्यात दिला.
