शुक्रवार, 29 मार्च 2024
  1. धर्म
  2. सण-उत्सव
  3. शिवजयंती
Written By

शिवछत्रपती

जय हिंद, जय भारती, दुमदुमते श्री शिवरायांची महती
श्री शहाजी नंदन, आधी किल्ले शिवनेरीला वंदन
धन्य ती भूमी, जेथ जन्मले शौर्यवदन, आमुची शक्ती
दशदिशांत पसरली शिवछत्रपतींची कीर्ती
 
माय जिजाऊंचे पुत्र, नेक शिवबांचे चरित्र
जिवाला जीव देणारे त्यांचे लहान-थोर मित्र
शिवरायांची थोरवी गाताना गात्र कधी न थकती
स्वराज्याच्या जिद्दीपुढे शत्रू भलेभले सरती
जय हिंद, जय भारती, दुमदुमते श्री शिवरायांची महती
 
लाल महाली उन्मत्त शाहिस्त्याची बोटे छाटूनी
प्रतापगडी गर्विष्ठ राक्षस अफजल्या फाडुनी, गाडुनी
भयमुक्त केली शिवरायांनी रयत आणि धरणी
लावूया त्यांच्या गडकिल्ल्यांची कपाळी माती
जय हिंद, जय भारती, दुमदुमते श्री शिवरायांची महती
 
वीर शिवरायांनी चातुरवर्ण्या दिली मूठमाती
तानाजी, बाजी, मावळे सारे त्यांचे साथी
गनिमा दाखविल्या न त्यांनी कधी पाठी
लढले बारा बलुतेदारही प्राण घेऊनी तळहाती
जय हिंद, जय भारती, दुमदुमते श्री शिवरायांची महती
 
आग्र्यात शिवराय जणू कडाडती वीज
शंभूसवे शिवबा कसे झाले गायब
मोगल साम्राज्या ना कसली गाज होती
येता मुलुखात, औरंग्याची धुळीस गेली मती
जय हिंद, जय भारती, दुमदुमते श्री शिवरायांची महती
 
आदिलशाही, मोगल साम्राज्य, इंग्रज आणि सिद्दी
जिद्दी शिवरायांनी चालू नाही दिली त्यांची सद्दी
गड-जलदुर्ग, उभारल्या आरमाराची उभी केली भिती
घोड्यावर जशी मांड, तशी त्यांची सागरावरही होती
जय हिंद, जय भारती, दुमदुमते श्री शिवरायांची महती
 
राजगडा कारभार पाहिला, रयतेला स्वाभिमान दिला
बुलंद किल्ले रायगडा स्थापिली राजधानी
फडकली स्वराज्याची भगवी पताका गगनी
मराठेमोळे राजे झाले आमुचे शिवछत्रपती
जय हिंद, जय भारती, दुमदुमते श्री शिवरायांची महती
 
मराठी भाषा, मराठमोळे राज्य, राजे आमचे प्रजाहितदक्ष
उत्कृष्ट योद्धा, आदर्श राज्यकर्ता ही भारतभूमी साक्ष
शिवरायांचे नाव घेता उन्नत होते आमुची पहाडी छाती
नतमस्तक आमुचे, आदर्श आमच्या शिवछत्रपतींची नीती
जय हिंद, जय भारती, दुमदुमते श्री शिवरायांची महती

उमाजी म. केळुसकर