Buxar train accident : बक्सरमध्ये रेल्वे अपघात, दिल्ली-कामाख्या नॉर्थ ईस्ट एक्स्प्रेस रुळावरून घसरली
Buxar train accident : दिल्लीतील आनंद विहार टर्मिनलवरून आसाममधील कामाख्याकडे जाणाऱ्या 12506 नॉर्थ ईस्ट एक्स्प्रेसचे 6 डबे बुधवारी बक्सर जिल्ह्यातील रघुनाथपूर स्टेशनजवळ रुळावरून घसरले. रात्री 9.53 वाजता झालेल्या या अपघातात चार जणांचा मृत्यू झाला.
पूर्व मध्य रेल्वे झोनचे मुख्य जनसंपर्क अधिकारी बिरेंद्र कुमार यांनी सांगितले की, बक्सर स्थानकाच्या अर्धा तास आधी ट्रेन अराहसाठी निघाली तेव्हा हा अपघात झाला. रघुनाथपूर स्थानकाजवळ रेल्वेचे डबे रुळावरून घसरले.
घटनेनंतर तातडीने मदत आणि बचावकार्य सुरू करण्यात आले असून घटनास्थळी रुग्णवाहिका आणि डॉक्टर पाठवण्यात आले आहेत.
अधिका-याने सांगितले की, अपघातस्थळावरून प्रवाशांना नेण्यासाठी पाटणा येथून 'स्क्रॅच रेक' पाठवण्यात आला आहे. ‘स्क्रॅच रेक’ हा तात्पुरता रेक आहे जो मूळ ट्रेनसारखाच असतो. रेल्वेने प्रवाशांसाठी आपत्कालीन हेल्पलाइन क्रमांकही जारी केले आहेत.
बिहारचे उपमुख्यमंत्री तेजस्वी यादव यांनी एक निवेदन जारी करून आपत्ती व्यवस्थापन आणि आरोग्य विभागांना शक्य तितक्या लवकर मदत करण्यासाठी तातडीने पावले उचलण्यास सांगितले आहे.
ते म्हणाले की, मी बक्सर आणि भोजपूरच्या जिल्हा दंडाधिकार्‍यांशीही बोललो आहे आणि त्यांना लवकरात लवकर घटनास्थळी पोहोचून मदतकार्य जलद करण्याच्या सूचना दिल्या आहेत.
रेल्वेमंत्री अश्विनी वैष्णव यांनी सांगितले की, बक्सरमध्ये ज्या ठिकाणी रेल्वेचे डबे रुळावरून घसरले त्या ठिकाणी बचाव कार्य युद्धपातळीवर सुरू आहे. एनडीआरएफ (नॅशनल डिझास्टर रिस्पॉन्स फोर्स), एसडीआरएफ (राज्य आपत्ती प्रतिसाद दल), जिल्हा प्रशासन, रेल्वे अधिकारी आणि स्थानिक रहिवासी एक टीम म्हणून काम करत आहेत. जखमींना रुग्णालयात दाखल करण्यात आले आहे. वॉर रूम कार्यरत आहे.
