सिक्कीममध्ये मुसळधार पाऊस, 2000 हून अधिक पर्यटक अडकले
गंगटोक. उत्तर सिक्कीमच्या लाचेन आणि लाचुग भागात गेल्या 3 दिवसांपासून मुसळधार पावसामुळे रस्ता बंद झाल्यामुळे 60 महाविद्यालयीन विद्यार्थ्यांसह 2400 हून अधिक पर्यटक अडकले आहेत. अधिकाऱ्यांनी शनिवारी ही माहिती दिली.
ते म्हणाले की, अडकलेल्या 2464 पर्यटकांना बाहेर काढण्यासाठी जिल्हा प्रशासनाने 19 बस आणि 70 छोटी वाहने तैनात केली आहेत. ते म्हणाले की, आतापर्यंत 123 पर्यटकांना घेऊन तीन बस आणि दोन अन्य वाहने राज्याची राजधानी गंगटोककडे रवाना झाली आहेत.
त्यांनी माहिती दिली की, अडकलेल्या प्रवाशांना बाहेर काढण्यासाठी जिल्हा आपत्ती व्यवस्थापन प्राधिकरण, सिक्कीम पोलीस, GREF, BRO, ITBP, आर्मी आणि ट्रॅव्हल एजन्सी असोसिएशन सिक्कीमचे रॅपिड रिस्पॉन्स टीम एकत्र काम करत आहेत.
दरम्यान, चुंगथांगकडे जाणारा रस्ता अनेक ठिकाणी बंद आहे. पाऊस थांबल्यानंतर दुरुस्तीचे काम सुरू होईल. अधिकाऱ्यांनी सांगितले की, उत्तर सिक्कीम जिल्हा प्रशासनाने अडकलेल्या प्रवाशांची माहिती मिळवण्यासाठी हेल्पलाइन क्रमांक सुरू केले आहेत.
